臘腸炒芥蘭

將所有臘腸同臘肉放入滾水裏灼一灼，去除表面雜質。

臘腸同臘肉分開蒸，臘腸蒸八分鐘後先撈起。

切走芥蘭老根，刮走粗莖外皮，然後斜刀切件。

水入少少鹽，將芥蘭浸一陣，期間準備好配料。

薑、乾蔥、蒜頭同甜椒切好，再將生粉水、糖同蠔油拌勻備用。

臘肉去皮，然後將所有蒸好嘅臘腸同臘肉切片。

鑊燒至最猛火，落油同薑片，然後將芥蘭落鑊，加米酒、鹽同糖炒勻。

將芥蘭多餘嘅水倒走，盛起備用。

臘味落鑊，慢火煎至微微焦香，逼出油脂。

甜椒同蒜頭落鑊，大火爆香。

將芥蘭同臘味回鑊，炒勻後淋入調好嘅醬汁。

加少許米酒同麻油炒勻，最後按口味加少少生抽即可上碟。